Потпишан Меморандумот за соработка помеѓу ЕВН Македонија и Машинскиот факултет при УКИМ во Скопје

Со големо задоволство ја објавуваме информацијата за потпишување на Меморандумот за соработка помеѓу ЕВН Македонија АД Скопје и Машинскиот факултет при Универзитетот „Св. Кирил и Методиј“ во Скопје.

Ова партнерство воспоставува силна рамка за соработка во областите на истражување, иновации и развој на нови производи и услуги, и предвидува зајакнување на сегментот на образованието преку создавање на инженерски профили способни да се справат со сите предизвици кои ги носи иднината,  со фокус на зелена и праведна транзиција.

Ваквиот начин на соработка е клучен за создавање на релевантен и динамичен образовен екосистем, кој одговара на реалните потреби на пазарот на труд. Очекуваме оваа соработка да овозможи трансфер на знаење и технологии, побрза комерцијализација на научните истражувања, како и развој на практични вештини кај студентите преку директна изложеност на индустриски предизвици. Ваквиот синергетски пристап придонесува за поттикнување на иновативниот начин на размислување, зголемување на конкурентноста на компаниите и создавање кадар подготвен за современите технолошки предизвици, што е од суштинско значење за постигнување на одржлив економски развој.

Првиот конкретен чекор за соработка е веќе тука: ЕВН Македонија АД Скопје е силен партнер и поддржувач на нашиот Национален натпревар за најдобар бизнис концепт за зелени иновации за средните училишта 2026!