Проф. д-р ВЛАДИМИР С. ГЕОРГИЕВСКИ, дипл.маш.инж. е роден
во Смедерево на 12.09.1943 год. Дипломирал на Електро - машинскиот факултет во Скопје во 1968 год. - машински отсек. Во 1968 год. е избран за асистент на истиот факултет. Во 1973 год. бил на едногодишна специјализација во Институтот за материјали во Ахен, СР Германија, како стипендист на DAAD. Во 1978 год. е избран за Предавач на Машинскиот факултет во Скопје. Магистрирал во 1978 год. на Машинскиот факултет - Скопје на тема “Просторни решеткасти системи”, а во 1980 год. е избран за Виш предавач. Докторирал 1984 год. на Машинскиот факултет во Скопје на тема “Просторни решеткасти системи - напонска прераспределба и деформации при парцијална нестабилност на одделни елементи”. Во 1984 год. е избран за Вонреден професор, а во 1988 год. за Редовен професор на Машинскиот факултет - Скопје. Во изминатиов период, Проф.д-р Владимир Георгиевски бил Претседател на Факултетскиот совет на Машинскиот факултет во Скопје 1984 -1986 год., Претседател на Извршниот одбор на Машинскиот факултет во Скопје 1986 -1988 год., Раководител на Институтот за заварување и заварени конструкции при Машинскиот факултет - Скопје во неколку мандати од 1983 год., член на Сенатот на Универзитетот “Св. Кирил и Методиј” во Скопје 2000 - 2004 год., Претседател на Друштвото за заварување и контрола без разорување на РМ, 2000 - 2002 год. и др.
Главен стручен и научен интерес му се носечките метални констукции (челични и алуминиумски), машинските материјали, испитувањето и контролата на заварените и други констукции. Од оваа област ја одржувал и наставата на додипломските и постдипломските студии на Машинскиот факултет во Скопје. Бил член на комисија и ментор на голем број (преку 100) дипломски работи, како и на повеќе магистерски и докторски (преку 30) работи од оваа област.
Учесник и/или раководител е на повеќе од 200 стручни и научни трудови од областа на носечките метални конструкции, материјалите, заварувањето и контролата и испитувањето на конструкциите. Автор е на 3 основни универзитетски учебници и една збирка задачи од оваа област. Во 1990 год. доделена му е наградата “13 Ноември” на град Скопје од областа на науката, за монографската книга “Лаке металне конструкције - просторни решеткасти системи”, издадена од познатата издавачка куќа за стручна и научна литература “Граѓевинска књига” од Белград.
Под негово раководство изработени се поголем број главни проекти за носечки метални конструкции на: спортски сали, бензиски пумпи, индустриски хали, антенски столбови и др., кои се изведени во повеќе места и градови во Р.Македонија, како и голем број експертизи и стручни мислења од оваа област. При тоа, треба да се нагласи дека во голем број од реализираните проекти Проф. д-р Владимир Георгиевски учествувал и како консултант и советник на Инвеститорот.
Проф. д-р Владимир Георгиевски во изминатиов период од 40 години учествувал во стручен тим или бил раководител и координатор при вршење суперконтроли (надзор) на голем број носечки метални конструкции на различни објекти (спортски и индустриски хали, антенски столбови, жичарници и ски-лифтови, покривни конструкции на бензински пумпи и т.н.). Во текот на целиот овој период бил и редовен член и раководител на овластената техничка комисија за технички прегледи на жичарниците и ски-лифтовите во Р.Македонија.
Подетален преглед со кратка содржина и осврт кон стручните и научните трудови, соработката со стопанството и другите дејности на Проф. д-р Владимир Георгиевски се презентирани во рецензиите објавени во Билтените на Универзитетот “Св. Кирил и Методиј” во Скопје при неговите избори и реизбори во звања, почнувајќи од асистентското во 1968 год., па се до редовен професор во 1988 год. и повторниот (доживотен) реизбор во истото звање во 2000 год.
.JPG)
